Tayzn D Tiyyad D'abdellah Amennou

Discussion dans 'Culture' créé par Souss, 28 Octobre 2016.

  1. Souss

    Souss Webmaster Membre du personnel

    14572933_1120341214701435_3283520411926211196_n.jpg

    Taɣʷzn

    Tagrabbayt ann as ittbk gar iɣarasn ann isggʷasn a ad, sg tgrst ar tiqqiqt n unbdu, macc ittiyssan is iga ilammn ẓmanin, ur ad dars issudu yan tin n udm n ṛbbi, iɣ as ur iqqd anufl, ur issn iɣ dark nɣ d ur tn tlit, ad gik ḍṛn asusn d gik kad issn nttan. Ass ad iga tigira n wass n ugadaz lli d ittawin ayt iɣrman n udrar ad ggʷzn, hat izzri d daɣ alkamyu nns is rad iddu maɣ inssa ur yagur yat ad nn takʷi tafukt, isbdd t, iswingm d ixf nns inna: “Tigira n wass a ad ur gis amya , rad yawi ṛbbi kra n ubudrar mad daɣ nsslukum, aynna t id ka ikkan”. Imikk ur nn akkʷ tmaṭil tswingmt ann nns, s iɣ id ikka yan bu ujllabi d idukan n yils aɣaras issili d yan usgrs lliɣ d iga imsaɣn i tarwa nns.
    -Aṛbbi is trit Asakʷi?
    -Yah, mnck ar ad iyi tfkt?
    -kṛaḍt tmmaḍ n warryal.
    -Qqumu ɣinna nit, iɣ gis ur tfkit sat timmaḍ ur tt gis ittkka uḍaṛ nnk.
    -Is trit kiyyin ad tsɣrt imawn nnɣ, rad ak fkɣ smmust, mad tnnit?
    -Yallah ɣli d , aynna k id ka sul ikkan, ufn udm nnk.
    ḍṛnt nit tillas s iɣ umẓn abrid, gan sin itsn g ugrabbay, argaz lli yusi tiklit ad ,ur akk gis illi wawal, aɣaras ixwa ur gis imsli n ufgan nɣ uzzal, ikk ukan imik yanni s tgira n tiṭ iḍaṛṛn n wad dars issudan gan ifnza n tfunast, ‘Wak wak’’ inna d ixf nns, izzri iḍuḍan f walln inna tawrira nɣ d iṭṭṣ kad d s is icwwrn, macc ɣiklli ɣiklli, ifnza ɣ udɣar nnsn, argaz ur ar isawal, ur sul issn bu ugrabbay mad iskar, iggʷz as d kra zund tuḍfin i ifaddn nns, ar d ittaddum ignzi nns s tidi, yat tiṭ ɣ ubrid yat ifnza, agayyu ar t tkkant ‘’Is ar iyi tt ka yadlli addran id bu lkamyawat, ar gisn ḍṣṣaɣ, awa ass ad nkkin ad s tt sul igan, taḍṣa, taḍṣa ṣafi”.
    Icwwr ayllig nn iga yan ufus s ddaw n wattag nns immiqqir nn d yat tmsskrt ifrsn, imkkn gis afus, isrs wayyaḍ f ugllay, inna d ixf nns: ‘’ Iɣ d ka s i tmmass rad s tt inn anniɣ g udm nns, nɣ as akk bbiɣ ifnza ann”.
    Ur issin aylliɣ nn ibdd ulkamyu ɣ Usakʷi, inna as d lxlq ann: ‘Bdd, srs iyi hann rad iyi tzzrit’’.
    Ibdd, ar ittmnid s tsga n tiṭ, iggʷz lxlq ann, ig d afus ad as d ifk idrimn nns, ur nn yadlli gis ismaql ura iga nn s is afus, ur sul ikʷti tarryalin lli f ittmtat yini as ‘’ɣir ddu, ad iyi d ur tsslkmt afus nnk’’.
    Iqqn d taggurt n ulkamyu, macc bu ugrabbay ar ukan sul tkkant agayyu nns, ad ur iɣli ɣayann tigira n ulkamyu ig as taqqayt nɣ t akkʷ icca g uɣaras, ar d ittmnid tisit n tama nns, ar ittannay yan ubudrar d usgrs nns, iga ddaw tayt nns sin ifnza n ufunas lli d isɣa g ugadaz n imalass.
    Inna ‘’Yuk yuk giɣ daɣ taḍṣa yaḍnin, ur yad sul gisnt la kṛaḍt timmaḍ la smmust, awa xttad ad igan taɣznt”.
    Zagora, 30-11-2013.
     
    Dernière édition: 28 Octobre 2016

Partager cette page