Poésie

Yawit taghrit, ura ajddig ighwitn Tagudî n-k a yan iàlfn tadûhânt Issus as kullu axzan kra gis iqn As nna gh tiwin s lmlàab iàaf Yawi-d tirzî, awin-d ankkid, irart A t awin s lkrrusa a mu iga win-s Ayyis iàdl, belhâq ccerd ilatn Làelf a ifrn, icîd, ujad n luqt Isu gh làin irîz, ur iga win-s Ad ur itmatâl i rriyib .... Tawenza d tebnghalt, ili f iggi u alen Nkerêd asen azag ar afud, neqqen( ??) Ar ad amnay an yitti s ugayyu n-s Lbelght tumlilt an tili gh udâr n-s A tcamir ilan reggabia n-s Lquftan nettan d lfarajia n-s Ilmma iluhên tajllabit n-s Igan lbdià lhûr nettan d lxenjr Rzzâ ngh cedt, ttâgia ad ittint Ilûh n slâh n-s, iffugh ad ihêwus Wanna izêran iffugh akw agayyu n-s A ha yyi lligh ak dagh crud, issenten A wanna iran ajdaà, a tid ixyr Ad ur isan dar meden, huln ten Inna d ixf n-s irxa ghik ad irint A yan ifhmn a ijmàa d ugayyu n-s Yan ur ifhmn a izêr wiyyad ihêrcen Ir ad i as mlin mani s idda rriy n-s Yan ur ighrin, ik timzgid hêrcn Imnàa i as u awal ura tajmmaàt *********************** Yan ur ighrin ik timzgid hêrcn Imnàa i as u awal ura tajmmaàt Awal ihêtajja a ifrn, ik igwmmayen Wanna ur iàdln a ighama gh iggi ils Ahînu nra ayyis bu lhêruz iqimen A sis ntburud gh lmlàab, nssufgh Lbarud belhâq, righ a tid ur nesgh Ura àlfegh, ura nsmmerzâ gh ugayyu inu Nexmmim, naf-in ghik an idêrra yagh A nnigh ugayyu inu, i Rebbi ajjat angh !! Igh ur izàm yan s lmujud, ikumc Ukan isber, yaj luqr f ugayyu n-s Ad ur irin a ismd lgherd, icmt A bu lawmal nezh awa f ugayyu n-k Lxir ifk i ak tid Rebbi, hnna ayt !! Nettan a iran rja nnun ad ikml A inna trit, ur gis abra ad ttersn A tallimt illan gh iggi n ijarifen Temdit i ijawwan d usêmmid d irifi Inna-d ikka ya(n) udwway iddu sisen Ikkis litcin, ur ta inwi, helken Litcîn n riyad a igan i tuzût n-k Arraw n-k, han ur liqn s ijarifen Ur illi abra at ng gh umalu d rrahêt Igh irrufa a isu, a yili d lxatêr As nna irrufa a isu, yili d lxatêr Ilûh ifr, ilûh s ujddig, itêrêh A walaynni a t ur zêrran ibalisen A llan id wac ar xellun ijarifen Ar attûn tamunt, waxxa yad llant Yan ittâfen ajjig gh usarag ifltn Iddu s lxla a gis zêrran iguntifen Idêlm ixf n-s, ifl ajddig asusn Iccit ugdîd, ifl ikccûden qquren Ghakud-an ar a ukan ihêrg ul n-s A waxxa smummuyn, idêlm agayyu n-s A wanna t yumn, nekkin uhmgh asen A ten-d ixcn ssâht, walbud n ssiàr A ssiàr iga zund algmâd iwaàr Kullu ma t yusin walbud a t utn A tasa sber, ha lhûb netta d nniyt Allah uàlm izd agh iggwiz ikalen A ddunit kullu nekka kem id, nggummitn Wanna ad mungh yan u as ibrray agh Igh ur izêra temà rad ittad iwalen Inna gh izêra latêmaà, hati iddu sisen Ukan ard remmin gh lmahîbba, ttun k A zund ahêbib an nekkin, nebrra ten A inna necrk, irxa nit ad ikml

LA CHANSON DU PÉLERINAGE

Lhîj a iga d lferêd a imsulmen fellagh (i) A belhâq yan as iderkn as gh inna cerà (i) Imma lmeskin Rebbi a gisen ukan ihânnan (i) Waxxa nit gan lferd, ur fellas ikllif Lhîj ur gin afud, ura illa s lmal Ur illa a gwma s lbabbur, ura têyyarat Wanna mu ten ikteb Rebbi ukan ar t irûh Yan angh innan lmal as t ilin Izêr yan sis imuddan, imt gh ugharas Ur as iktib Ilahi lmaqam an a t ik Kada n yan illa dars lmal ikafan Ura ssâht, gin cbab, ar ka sul iterqqas Inna d ixf n-s lhîj, ur ta ser tengh isêlêh Ajjagh ar kigh ncib acku ra sul rwwigh (i)

Wa sul isker ddunub acku ur ta qenàin (i) Belhâq iblis iga ddâlm inna i as mk-an Nettan a ur irin ad i as akw isâhâ yat Gh lhîj, ura rmdân , ura tazâllit Wanna ighrra cbab n-s, ighrrut lmal Ighrrut iblis, ur uddin xamsa sâlawat Ur azûmn, ur ihûjji, lxatâr agh llan Igh i as ismêh Rebbi, ur fellas illa yat (i)

Mad agh imlan lhîj is ur illi s lmal (i) A willi i as igan adâr, naftn-in lkemen Injjaten Rebbi gh lhwayc, ura irafan Sêberen i lxuf d lâz aylligh ukan lkemen Inna i ak kra labud ar kigh nttâf lmal Igh ur ighri waxxa dark itters lmlyar Ura sin, ura krâd, ur k sselkemen i gh-in As-an ighra waxxa dark ur llin lflus Ura ssâht wa labud a xuya a ten telkemt Ma i agh imlan mk-ad awen nnigh is llan Kada n yan nemmaggart ur ittâf afus Illa ma igan abidâr lahâsn tiqqert Yan udâr d uàkkaz, meskin, as itûwwaf Ilin irgazen ciben kwnan, lkemen akal Yan ur izêdarn i twada, itûwwaf s lmisan (i)

Wa ad urrigh s lhêjjaj a flan a ten fasrgh (i) As nna gh ran amuddu ; lmsaken ar allan S lhem n lhêbab n-sen, ura wi u arraw Wanna iran lhîj a ifrêh a t ixassân Agharas a k ur ihuwl meqqar illa ttûl Têyyara terggig zun ka nkcem lutîl Ghar nkcem dis, nggawr, ur akw nmatîl Ghar tayl a lhêbab aylligh neffugh akal Nelûh izêri inu, huddant a xuti u aman Akal, kkan ger yyi dis tmanya kilumitr Ur nessin ma kullu gisen illan a t inigh Ghar idraren d tagut an sumuqqulagh Tters agh-d lqhwa gitsent, ura tiram Lkemgh-n Jedda, ggwiz agh ilmma frêh agh Lligh ngh iqil Rebbi aylli gh ukan lkemgh Nefl gh-id asêmmid, lhêma gh-in nghan agh Ghwin medden lhûjuj n-sen ur ighama yan Ghaylli igan ccerd, ighwit lmutâwwif Ghar iffu lhâl, kra ddan s lkar a t awin Ura taksiat mmzzîyen, iàmr ugharas Illa Rabgh, illa Badr, kullu gh ugharas A ghar nekcemen Lmadina, ntaghaca i akw S lakram d lfrêh igguten lligh-n llan (i)

Ilmma nzûr Nnabi, imunagh akw lgherd (i) Izug itês, agwigh aggurn amr s lfarâh N Sidi Nebi lli mu zzûlgh ammas n têrf n-s Âh a rrawda d lmanber, cerif ur a kun ttugh Lastwanat lfadîla, igh tent lkemgh Nnigh i lmut :"i Rebbi an tawit rrûh n-gh" Ha yyi kcemgh a ljent, ghar awin rrûh (i) Miyat alf àam n tudert igh t ikka yan (i) Wa yutit ya u as igan wi lmaqam an A sin lasêhâb a hâdan k-in ay acafià Illa syyidina Bubaker, nettan iwalat Sayidna Àumar iga amir n lmuminin Ar ittamr, ar itnhu lmenker lligh isul Lbaqiàr ra k-id nzûr s nniyt i iman Kullu tarwa n nnabi rsul, netta agh llan Cuhada lmujahidin, limam Malik Righ ay adrar n Uhûd an fellawen slemgh (i) Nselm f Sidi Hêmza, nghwi nit agharas (i)

A zzîyart n tmzgadiwin nekmmel tent (i) Wa smmust ura quba, alghama( ??) an têrf n-s Ura tin Àali d Bubaker, ura Àumar Neddu s lqber n nnabi rsul, ay acafià A dis nmsîfîd, ad agh nurri gh ugharas A zzîyart nsala gisnt, nkmmel tent Ighama agh dagh lhîj igh ufigh a ten kmmelgh Ay anu n àala hâj igh t axuya telkemt A gis nggwiz,a ntuddâ, nerkà lmaqam Inwwa lhâj lhîj n-s s mek nna nten ran Làumra nigh lhîj, nigh inwwa ar liqeram( ??) A inna ira labud an hêrmen gh ugharas Ura talbita, labud ans t ittinin

Ar kigh ikcem i lblad itûwf gh Lhâram Izûr saydina Brahim, ura ay arraw n-s Ura Lhâj alaswal, ran fellas sellemen Isu gh-d amda amlghu( ??), bun( ??) fellas irafan A ssafa wa lmarwa labud kullan ma issan A gis isàu waxxa dars amr yat tiqqert Igh ur izêdar i twada lkrrusa tasit Ar kigh isàa ddunub ur fellasen ghaman (i)

Wi qqabl lhâj lferd n-s ar ten kemln A tâwaf gh îd d uzal, yan iran lxir A ten yagwm, ad ur igawr, ur sul ufin Ukan itêfr lhêsab ar kigh asen ghaman A yumayn s làid, ighli irûh-n Minan A gisen nsen lhêjjaj ar kigh ifaw lhâl A zik sêbâh, medden gan-n cala s Àarafat Issuda kra tamubil, kra ifta gh lkar Illa ma i as igan adâr, kra ifta f uram Njmaàn-n medden, Àrafat agh-n klan A ghar ilkem lmgherb, ha igharasen àmmerni S Lmuzdalifa ra gisen ins yan iran A wanna ur irin izzâl gh-in, ccin imik A grun izêran n terjim ruhên k a Minan Igh-d iffu lhâl làid, ur k sul isala yan Kuyan ar ittazzal f lmasâlîh n-s Wa ad ukan nzzâl, rjemgh, ukan ghers agh Ghergh i taxi lli rad agh yawi s Lhâram Nsker tawaf lifadâ, nefsi gh iskraf Nekkis lihêram, ura azzar, ilmma frêh agh Lsagh lksut inu gegh myya n àla xir (i)

Belhâq rwâh illa dagh gh ammas Minan Krâd ussan n terjim ar ten kemmelgh Ilmma nudà-d Lbit, hêyyilgh i ssifar Nurri-d a gwma s tmazirt s lfarâh (i)

Rebbi hûrmigh làizza n-k, ura awal n-k (i) Kullu ma iran lhîj a testert lumur n-s (i)

Haj Làarbi ben Mbark