Contes & Recits

Ist àemti Tikerkas

vendredi 27 mai 2005

Maqqargh ist àemti Tikerkas. Ggallent yi, ggalgh asent, hiydent yi, mungh isent.Nasi wawerz, nruH taggurt, ighers agh usarag i unwal. Nbbi tigjda f ixsan, ngi tent in gh ya ugdur, nsergh as s taqqurt ar làerc làaDim. Nasi d yat tgwdumt s myat rami, nut sers agdur lli. Walu, ur t yagh walu. Nasi d ya uxsis n tilli irmin, nut t ukan sers, ig kullu tfasis ! Asigh gis si ixsan, gegh ten gh uqelmun n uselham inw ar zzigizgh. Inna gh uka lkemgh rbià, nnigh urta d nttan ayad : lkemgh afud nnigh urta d nttan ayad, lkemgh takwst nnigh urta d ntta, lkemgh afud n tilkit nnigh urta d ntta, lkemgh ghilli gh imDel iwT, nnigh :“ Allah ukbar rbià ayad ! Awa àladd ixsan ad a kullu gin tifunasin !” IluH d ixsan lli, gin kullu tifunasin ar cttan, ar cttan...

Skkusgh, kisgh d ixf inw ar t zrrugh. DelHin annigh tifunasin ssutelnt yi i ya ighir. Ar tazzlagh, ar tazzlagh, ar tazzlagh, saqelgh d annigh d agayu nw ssuteln as igaywarn. Utegh ten id s ya uDar, yut asen azuzwu. Utegh ten id s wi ssin, yut asen azuzwu. Utegh ten id s uselham yut asen azuzwu. Ddugh ar tizzlagh, ar tizzlagh, ar tizzlagh aylligh iqqur imi nw. Afigh n yat temghart ar tZg taramt ns, nnigh as : “I Rbbi kf yi kra n waman ad sugh”. Tnna yi d : “ awa kra imik n lHlib ukan igh t trit”. Nnigh as : “kf yi t i Rbbi hati iqqur imi nw.” Tkf yi t id ar ssagh ar ssagh ar ssagh aylligh jjawengh. Nnigh as : “Allah Allah, a isimlul Rbbi alen n tramt ad iklli imllul lHlib ns !” Tamz yi ar yi tkkat, ar yi tkkat, ssufgh ighuwmran, mertgh tt nit. Tnna “ur d ghiknna ad ttinin midden”. Nnigh as “manik za ?” Tnna : “a ig Rbbi lbaraka, a izayd Rbbi lxir.” Nnigh as : “tinigh t i wanna maqqargh ula wanna sengh”. Miqqirgh kra n wid ddan an nmDeln yan immut, nnigh asen : “ A ig Rbbi lbaraka.” Amzen yi ar yi kkaten ar yi kkaten ar yi kkaten, ssufgh ighuwmran, mertgh ten nit. Nnan yi : “ur d ghiknna ar ad ttinit !” Nnigh asen : “manik za ?” Nnan yi :“ini a ig Rbbi tmi n lbas ». « Tinigh t i wanna maqqargh ula wanna sengh”. Miggirgh dagh kra n wid iwin ya ugdud, nnigh asen : “a ig Rbbi tmi n lbas”. Amzen yi ar yi kkaten ar yi kkaten ar yi kkaten, ssufgh ighuwmran, mertgh ten nit. Nnan yi : “ur d ghiknna ar ad ttinit !” Nnigh asen : “manik za ?” Nnan yi : “ini an giz tili ar tarwa n tarwa n tarwa ns !“ « Tinigh t i wanna maqqargh ula wanna sengh”. Afigh n ya urgaz ar iqqwaz anu, nnigh as : “ak iàawen Rbbi ! a n giz tilit ar tarwa n tarwa n tarwa nk !” Yamz yi ar yi ikkat ar yi ikkat ar yi ikkat, ssufgh ighuwmran, mertgh t nit ! Inna yi : “ur d ghiknna ar ad tinit”. !” Nnigh as : “manik za ?” Inna yi :“ ini ukan bbukk teldid aman !”. « Tinigh t i wanna maqqargh ula wanna sengh”. Afigh n yan ar iqqwaz tisent, nnigh as : “a k iàawen Rbbi yaw ! ini ukan bbukk teldid aman !” Yamz yi ar yi ikkat ar yi ikkat ar yi ikkat, ssufgh ighuwmran, mertgh t nit ! Inna yi : “ur d ghiknna ar ad tinit”. !” Nnigh as : “manik za ?” Inna yi : “ini kra d teldit sigh iQQur !” « Tinigh t i wanna maqqargh ula wanna sengh”. Afigh n yan ar ittenwqqal azalim. Nnigh as : ““a k iàawen Rbbi yaw ! kra d teldit sigh iQQur !” Yamz yi ar yi ikkat ar yi ikkat ar yi ikkat, ssufgh ighuwmran, mertgh t nit ! Inna yi : “ur d ghiknna ar ad tinit”. !” Nnigh as : “manik za ?” Inna yi : “ini timlulent ak, tizgwighent ak, ilint ak anck n tbuqqalin !“ « Tinigh t i wanna maqqargh ula wanna sengh”. Afigh n yat tfqqirt TaDen alen, nnigh as : “a kem iàawen Rbbi ! timlulent am, tizgwighent am, ilint am anck n tbuqqalin !” Tamz yi ar yi tkkat, ar yi tkkat, ssufgh ighuwmran, mertgh tt nit...

Tmi ns ayan ur d tmi n làemr inw...

Par Illisntmazirt

Répondre à cet article