Musique

 Ijawb urkkab i uzêllal is as-d nnan
 Ura-n izray ddunit ibra yan islàaben ayyis
 Igas ticikert, ura tarigt, ura ljam n-s
 Igasn tawenza n lhêrir mas itbnghal
 A yan mid ur ifl babas lmukhêlt nighd ayyis
 Han ur igi ccajià, ura iflt id wayyâd
 Zund ghwan, ur ak zrin gh ngr tacbarin
 Agaz igan lhûr, ar ak nit itbayan
 Lmukhêlt n lqurtâs d u ayyis agh a thllan
 Sawl at a yan innan :" azêllal izrit in".

 Ijawb uzêllal i urkkab is as-d nnan
 Ay amkuf lli itàibn lbnat, ur ta tzêrit
 Igh a irgha ccêmà, ar tenffaln lzghuf ishu yan
 Igh a yall ul n tccumàit, ar ak-d iswktay
 Izêri n lbent amzwaru gh u adân d lfrêh
 Igh a twalwal, igh a tsumussu kra gh ihwawiyen
 Udem n Rebbi, ya lalla ma tgit ? izd lmelk ?
 Izd is immussa lfnar ? Izd lmnzel a infln ?
 Izd amhmaz a ismussu ugllid gh udâr
 Lligh kullu tiwit izêri i bnadm is darun
 Wanna-n fellawent iluhên aln , ihêrg ul n-s
 Sawl at a walli innan :" amnay izri tin"

 Ijawb urkkab i uzêllal is as-d nnan
 Taccâjiàt af ixlq Rebbi irgazen d isan
 Ur ijjenjim awal men dun irgazen d isan
 Ura izggur i lhêrkt bla lmukhêlt nghd isan
 Ay amkuf a walli itàiben isan ur gik zzin
 Ur ta tzêrit lxucat n zegh cbarat
 Ura ten issiwid lhês n tarsâsin d lbarud
 Inna s ki-n ukan irur a ixef ijjenjem awal
 Ay argaz lmukhêlt d u ayyis n-s agh tehllan
 Sawl at a yan innan : "azêllal izri tin"

 Ijawb uzêllal i urkkab is as-d nnan
 Ay amkuf lli itàiben lbnat ur ta tzêrit
 Iggi làin n Mast lli-d ismun tirbatin
 Yat ur tugr yat, yat tgadda zund titbirin
 Igh iffertl tami, ibbayyen-d udem zund ayyur
 Zund lmri, zund ayyur gh azufi gh ignwan
 Ay amkuf lli itàiben lbnat ur ta tzêrit
 Taslit igh a tent ssengafnt Tirgitin
 Ur illi ltam, ura taghneburt, ur ihêbi yan
 Zzin, ghik-lli f ti-d ixelq Rebbi as tzêrrat
 A zzin n Ihâhân, irwas faruz igh gis illa
 Uslal n tamment, idl s lhêrir nighd lmlef
 Azzar i Thâhâtin, tuxsin i ist Baàmran
 Irden i Intuggwa ; Ihâhâh, lasêl n tajdàin
 Ait Baàmran i lbarud, ura tacbarin
 Id bu tuggwas n lhêrir, id bu jjenjem awal
 Gelb a rrami tastta, galb a llulb imic
 Iglb umadlu gh ignwan, galbent tizwa rric
 Gelb a lalla talmrit a tzêrt udem nnun
 Zund aàbruq n ljdid igh t yusi udllal
 Tayri n zzin n Ihâhân, igh ak tlul gh lxelq
 Ar itàrag zund igh iswa làenber gh u atay
 Izd a tasa nu thêmlt bahra ya ugwilal
 Yan bu tuxsin isufun zund ljuhr n Ccam
 Bark Llah ! irwas kra ircil Ugafay
 Bark Llah ! irwas kra lluban Ugwlmim
 Bark Llah ! irwas kran lemcmac n Beni Mellal
 Izd a tasa nu, thêmlt zzin ghiklli
 Ihêml ttajr timuzunin ka s a tjmàan
 Izd a tasa nu thêmlt bahra ya ugwilal
 Yan bu tuxsin isufun zund ljuhr n Ccam

Boubaker Anchad